1803-cü il aprelin 12-də Car-Balakən caamatının Rusiyanın hakimiyyəti altına alınması haqqında saziş bağlandı. Sazişə əsasən yerli camaat 220 pud ipək verməli idi. Car-Baləkinin fəthindən sonra İlisu sultanlığı da Rusiyanın təəbəliyini qəbul etdi. General Sisianov Gəncə xanlığının ələ keçilməsinə böyük əhəmiyyət verirdi. Çünki Gəncə qalası rus qoşunlarının Azərbaycanın içərilərinə doğru irəliyə getməsi üçün bir açar idi. 1803-cü ilin dekabrında Sisianov Cavad xana təslim olmaq haqqında ultimatum verdi. Lakin Cavad xan ona cavab verir ki, Gəncəyə yalnız meyitlərin üstündən keçə bilərsən. Sisianov 11 topu olan piyada bataliyonunu, 3 eskodron və 2 kazak yüzlüyündən ibarət qoşunu Gəncə üzərinə yeritdi. Şəhərin iki verstliyindəki Quruqobu adlanan yerdə rus qoşunları ilə gəncəlilər arsında ilk vuruşma oldu. Cavad xan bir qədər müqavimətdən sonra Gəncə qalasına qayıdır. Rus qoşunları Gəncəni mühasirəyə alırlar. Mühasirə bir ay davam edir. 1804-cü il yanvarın 2-dən 3-nə keçən gecə ruslar qalaya hücuma başlayır. Onların iki cəhdi dəf olundu. Qalanın müdafiəçiləri inadlı müqavimət göstərirdilər. Döyüşlərdə Cavad xan və oğlu Hüseynqulu bəy və şəhər əhalisindən 250 nəfər həlak oldu. Şəhərin təslim olunmasında şəhərdə yaşayan ermənilərin xəyanəti mühüm rol oynadı.
Baxılıb: 9614
Dostuna göndər
