Azərbaycan BMT-yə üzv qəbul olunmuşdur

1991-ci il oktyabr ayının 29-da Azərbaycan Respublikasının Ali Soveti Azərbaycanın müstəqilliyinin tanınması xahişi ilə BMT-yə müraciət qəbul edib.
BMT-nin Baş Assambleyası sovet respublikalarının təşkilata qəbulu məsələsini dekabrda müzakirəyə çıxarsa da, həmin vaxt yalnız üç Baltikyanı respublika üzvlüyə qəbul edilmişdi.
Azərbaycanın və keçmiş SSRİ-nin digər respublikalarının BMT- yə qəbulu 1992-ci il martın 2-də gerçəkləşmişdir.
1992-ci il mayın 6-da isə Azərbaycanın BMT nəzdində Daimi Nümayəndəliyi açılmışdır.
Azərbaycan BMT ilə əməkdaşlığın ilk günündən başlayaraq BMT platformasından beynəlxalq ictimaiyyətin diqqətini Ermənistan-Azərbaycan münaqişəsinə cəlb etməyə və BMT-nin potensial imkanlarından yararlanaraq sülh sazişinin əldə olunmasına çalışmışdır.
Qeyd edək ki, Birləşmiş Millətlər Təşkilatının Təhlükəsizlik Şurası 1993-cü ildə 822, 853, 874, 884 saylı Azərbaycan Respublikasının ərazi bütövlüyünün tanınmasına və işğal olunmuş Azərbaycan ərazilərinin qeyd-şərtsiz azad edilməsinə dair 4 qətnamə qəbul edib. Hazırda Azərbaycan BMT-nin bir çox xüsusi qurum və orqanları ilə fəal və səmərəli əməkdaşlıq edir. Bu sırada BMT-nin İnkişaf Proqramı (BMTİP), BMT-nin Qaçqınlar üzrə Ali Komissarı, BMT-nin Uşaq Fondu, BMT-nin Təhsil, Elm və Mədəniyyət Təşkilatı, Sənaye İnkişaf Təşkilatı, Ümumdünya Səhiyyə Təşkilatı, BMT-nin Qadınlar Fondu, Atom Enerjisi üzrə Beynəlxalq Agentlik, Nüvə Sınaqlarının Hərtərəfli Qadağan olunması haqqında Müqavilə Təşkilatı və s. qeyd etmək olar.
1992-1996-cı illər ərzində BMT-nin TŞ-nın sədri və BMT Baş Katibi Azərbaycan Respublikasının ərazi bütövlüyünü, suverenliyini təsdiqləyən və münaqişənin sülh yolu ilə həll olunmasına yönələn ATƏTin Minsk Qrupunun səylərini dəstəkləyən münaqişə üzrə bir sıra bəyanatlarla çıxış etmişdir. 1996-cı ildən başlayaraq BMT Baş Assambleyası “BMT və ATƏT arasında əməkdaşlıq haqqında” Qətnaməsində Azərbaycan Respublikasının ərazi bütövlüyünü təsdiqləyir.
Ümummilli liderimiz Heydər Əliyevin 1994-cü ildə BMT Baş Məclisinin 49-cu sessiyasında çıxışı Azərbaycan həqiqətlərinin BMT səviyyəsində dünyaya çatdırılması baxımından mühüm hadisələrdən biri kimi yadda qalmışdır. Bu siyasəti davam etdirən Prezident İlham Əliyev də BMT tribunası vasitəsilə Azərbaycan həqiqətlərini dünyaya çatdırır. Prezident İlham Əliyev BMT Baş Məclisinin 59-cu sessiyasındakı çıxışında sülhün qorunması və münaqişələrin aradan qaldırılması istiqamətində BMT-nin rolunun artırılmasının vacibliyini vurğulamışdır.
Ermənistan-Azərbaycan, Dağlıq Qarabağ münaqişəsi ilə əlaqədar BMT-də sənədlərin qəbul olunması ölkəmizin uğurlarından biridir. Lakin buna baxmayaraq BMT TŞ-nın Ermənistan ordusunun Azərbaycan ərazilərindən çıxarılmasına dair qətnamələri bu günədək yerinə yetirilmir.

  Baxılıb: 4173       Dostuna göndər